തങ്ങള്‍ കുഞ്ഞ് മുസ്‌ല്യാര്‍

ഉള്ളടക്കം

→ ടി.കെ.എം കോളേജ് ട്രസ്റ്റ്

കേരളത്തിലെ വിദ്യാഭ്യാസ, പത്രപ്രവര്‍ത്തന, സംസ്‌കാരിക മേഖലകളില്‍ വിലമതിക്കാനാവാത്ത സംഭാവനകള്‍ നല്കിയ പ്രശസ്തനായ വ്യവസായിയും സാമൂഹ്യ പ്രവര്‍ത്തകനുമായിരുന്നു തങ്ങള്‍ കുഞ്ഞു മുസ്‌ലിയാര്‍.

കൊല്ലം ജില്ലയിലെ കിളിക്കൊല്ലൂരില്‍ കന്നിമേല്‍ മുസ്‌ലിയാര്‍ കുടുംബത്തിലെ അഹമ്മദ്കുഞ്ഞ് മുസ്‌ലിയാരാണ് പിതാവ്. സാധാരണ സ്‌കൂള്‍ വിദ്യാഭ്യാസം മാത്രമെ തങ്ങള്‍ കുഞ്ഞിന് ബാല്യത്തില്‍ ലഭിച്ചുള്ളൂ. 18-ാമത്തെ വയസ്സില്‍ ജോലി തേടി സിലോണില്‍ പോയി. അവിടെ രത്‌നഖനന തൊഴിലിലേര്‍പ്പെട്ടു കുറച്ചുകാലം കഴിഞ്ഞുകൂടി. അതിനുശേഷം മലായയിലേക്കു പോയി. കുറേക്കാലത്തെ പ്രയത്‌നഫലമായ സമ്പാദ്യവുമായി നാട്ടിലെത്തുകയും 1935-ല്‍ കശുവണ്ടി വ്യവസായത്തിന് ആരംഭമിടുകയും ചെയ്തു. കേരളത്തില്‍ കശുവണ്ടി വ്യവസായം തുടങ്ങിവരുന്ന കാലമായിരുന്നു അത്. കിളികൊല്ലൂരില്‍ ആദ്യമായി ഒരു കശുവണ്ടി ഫാക്ടറി സ്ഥാപിച്ചു. അനേകം തൊഴിലാളികള്‍ക്ക് ഒരുമിച്ചിരുന്നു പണി ചെയ്യുവാനുള്ള സൗകര്യമൊരുക്കി. ഈ മേഖല വികസിപ്പിച്ച് വന്‍ വ്യവസായമാക്കി മാറ്റി. ഈ വ്യവസായത്തില്‍ ഏറെ നേട്ടങ്ങള്‍ കൈവരിച്ചു. അതോടുകൂടി ‘കശുവണ്ടി രാജാവ്’ എന്ന പേരില്‍ ഇദ്ദേഹം പരക്കെ അറിയപ്പെട്ടു. തന്റെ തൊഴിലാളികള്‍ക്ക് മിനിമം വേതനം, ഉത്‌സവകാല ബോണസ് എന്നിവ ആദ്യമായി നടപ്പിലാക്കി. 1940-ല്‍ യു.എസ്. മാസികയായ ‘ഫോര്‍ച്യൂണ്‍’ ലോകത്തിലെ ഏറ്റവും കൂടുതല്‍ ആളുകള്‍ക്ക് നേരിട്ട് ജോലി നല്‍കിയ ഏക തൊഴിലുടമയായി മുസ്‌ല്യാരെ വിശേഷിപ്പിച്ചിരുന്നു. 25,000 തൊഴിലാളികളായിരുന്നു അന്ന് കമ്പനിയിലുണ്ടായിരുന്നത്.

1940 കളിലും 50 കളിലും കശുവണ്ടി കയറ്റുമതിയില്‍ കേരളം ആധിപത്യം പുലര്‍ത്തിയിരുന്ന കാലഘട്ടത്തിന്റെ ഓര്‍മകളാണ് തങ്ങള്‍ കുഞ്ഞു മുസലിയാര്‍ എന്ന പേര് വിളിച്ചോതുന്നത്. കുറ്റമറ്റ ആസൂത്രണത്തിലൂടെയും ചിട്ടയായ നിര്‍വഹണത്തിലൂടെയും വിപുലമായ ഒരു ബിസിനസ് സാമ്രാജ്യം കെട്ടിപ്പടുക്കുകയും രാഷ്ട്രത്തിന് ആവശ്യമായ വിദേശനാണ്യം സംഭാവന ചെയ്യുന്നതില്‍ നിര്‍ണായക പങ്ക് വഹിക്കുകയും ചെയ്ത അദ്ദേഹം ഈ രംഗത്തെ ഒരു മുന്‍നിരക്കാരനാണ്.

വ്യവസായരംഗത്തു നിന്ന് ലഭിച്ച ആദായം കൊണ്ട് വിദ്യാഭ്യാസരംഗത്തും സാമൂഹിക സേവനരംഗത്തും ഉദാരമായ ക്ഷേമപ്രവര്‍ത്തനങ്ങള്‍ ഇദ്ദേഹം നടത്തി.
കേരളത്തില്‍ സ്വകാര്യ മേഖലയിലുള്ള ആദ്യത്തെ എന്‍ജിനീയറിങ് കോളേജ് സ്ഥാപിച്ചത് ഇദ്ദേഹമാണ്. 1958-ല്‍ തങ്ങള്‍ കുഞ്ഞു മുസ്‌ലിയാര്‍ എന്‍ജിനീയറിങ് കോളേജും തുടര്‍ന്ന് ടി.കെ.എം. ആര്‍ട്ട്‌സ് ആന്‍ഡ് സയന്‍സ് കോളേജും (1965) കിളികൊല്ലൂരില്‍ സ്ഥാപിച്ചു. 1964-ല്‍ എം.ഇ.എസ്. പ്രസ്ഥാനത്തിന് തുടക്കം കുറിച്ചതും മുസ്‌ലിയാരായിരുന്നു. മുസ്‌ലിം സമുദായത്തിന്റെ വിദ്യാഭ്യാസപരമായ പുരോഗതി ലക്ഷ്യമാക്കിയാണ് ഇതിനു തുടക്കമിട്ടത്. സമുദായത്തിന്റെ വിദ്യാഭ്യാസപരവും സാമൂഹികവുമായ പുരോഗതിക്കുവേണ്ടി രൂപീകരിക്കപ്പെട്ട തിരുവിതാംകൂര്‍ മുസ്‌ലിം മജ്‌ലിസ്, മുസ്‌ലിം മിഷന്‍ തുടങ്ങിയ സംഘടനകളുടെ അധ്യക്ഷനായും ഇദ്ദേഹം സേവനമനുഷ്ഠിച്ചിരുന്നു.

ടി.കെ.എം കോളേജ് ട്രസ്റ്റ്

രാഷ്ട്രത്തിന്റെ വളര്‍ച്ചയില്‍ വിദ്യാഭ്യാസത്തിന്റെ പ്രാധാന്യം മുസ്‌ലിയാര്‍ മുന്‍കൂട്ടി കണ്ടു. ഈ ചിന്ത 1956-ല്‍ ടി.കെ.എം എജ്യുക്കേഷണല്‍ ട്രസ്റ്റിന്റെ രൂപീകരണത്തിന് വഴിയൊരുക്കി. ഇന്ത്യന്‍ റിപ്പബ്ലിക്കിന്റെ ആദ്യ പ്രസിഡന്റ് ഡോ. രാജേന്ദ്ര പ്രസാദ് 1956 ഫെബ്രുവരി 3-ന് തങ്ങള്‍ക്കുഞ്ഞ് മുസ്‌ലിയാര്‍ കോളേജിന് തറക്കല്ലിട്ടു. 1958 ജൂലൈ 3-ന് അന്നത്തെ കേന്ദ്ര ശാസ്ത്ര സാംസ്‌കാരിക കാര്യ മന്ത്രി പ്രൊഫ. ഹുമയൂണ്‍ കബീര്‍ ഔപചാരികമായി ഉദ്ഘാടനം ചെയ്തു. ഇന്ന്, TKM കോളേജ് ഓഫ് എഞ്ചിനീയറിംഗ് അതിന്റെ ഐതിഹാസിക സ്ഥാപകന്റെ കാഴ്ചപ്പാട് ഉയര്‍ത്തിപ്പിടിച്ചുകൊണ്ട് ദേശീയ അന്തര്‍ദേശീയ പ്ലാറ്റ്‌ഫോമുകളില്‍ സുപ്രധാന സ്ഥാനങ്ങള്‍ അലങ്കരിക്കുന്ന ആയിരക്കണക്കിന് ബിരുദധാരികളുടെ അഭിമാനമായ സ്ഥാപനമാണ്.

ടി.കെ.എം കോളേജ് ട്രസ്റ്റിന് കീഴില്‍ TKM കോളേജ് ഓഫ് ആര്‍ട്‌സ് ആന്‍ഡ് സയന്‍സ്, TKM ഇന്‍സ്റ്റിറ്റ്യൂട്ട് ഓഫ് ടെക്‌നോളജി, TKM ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റ്, TKM സ്‌കൂള്‍ ഓഫ് കമ്മ്യൂണിക്കേഷന്‍ ആന്‍ഡ് ഇന്‍ഫര്‍മേഷന്‍ ടെക്‌നോളജി, T.K.M സെക്കന്‍ഡറി സ്‌കൂള്‍, TKM സെന്റിനറി പബ്ലിക് സ്‌കൂള്‍, TKM ഹൈസ്‌കൂള്‍, TKM ഹയര്‍ സെക്കന്‍ഡറി സ്‌കൂള്‍ തുടങ്ങിയ സ്ഥാപനങ്ങള്‍ ട്രസ്റ്റ് സ്ഥാപിച്ചു. സെന്റര്‍ ഫോര്‍ അഡ്വാന്‍സ്ഡ് ലേണിംഗ്, ടികെഎം സ്‌കൂള്‍ ഓഫ് ആര്‍ക്കിടെക്ചര്‍ തുടങ്ങിയവയും നിലവില്‍ വന്നു.

പ്രസിദ്ധീകരണങ്ങള്‍

അദ്ദേഹം വിജ്ഞാന പോഷിണി എന്ന ഒരു പുസ്തക പ്രസിദ്ധീകരണശാല സ്ഥാപിച്ചു. 1944-ല്‍ പ്രഭാതം എന്ന വാരിക തുടങ്ങി. അത് പിന്നീട് ഒരു ദിനപത്രമാക്കി മാറ്റി. അത് സംസ്ഥാനത്തിന്റെ സാമൂഹിക-രാഷ്ട്രീയ രംഗങ്ങളില്‍ വലിയ സ്വാധീനം ചെലുത്തിയിരുന്നു. ഇന്ത്യയൊട്ടാകെ ശിഥിലീകരണത്തിന്റെയും വര്‍ഗീയതയുടെയും സൂചനകള്‍ പ്രത്യക്ഷപ്പെട്ട കാലത്ത്, തിരുവിതാംകൂറിലെ ജനങ്ങളില്‍ സാഹോദര്യത്തിന്റെയും ജനാധിപത്യത്തിന്റെയും വെളിച്ചമായി മാറിയ ‘പ്രഭാതം’ സമാധാനത്തിന്റെയും സമാധാനത്തിന്റെയും സന്ദേശവാഹകന്‍’ എന്നാണ് മുസ്‌ലിയാര്‍ തന്റെ പത്രത്തെ വിശേഷിപ്പിച്ചത്. പ്രയോഗികദ്വൈതം (1946) ഉള്‍പ്പെടെ മലയാളത്തില്‍ ഒന്നിലധികം പുസ്തകങ്ങള്‍ അദ്ദേഹം രചിച്ചു. മനുഷ്യനും ലോകവും അമേരിക്കയില്‍ Man and the World എന്ന പേരില്‍ ഇംഗ്ലീഷിലേക്ക് വിവര്‍ത്തനം ചെയ്തു.

തങ്ങള്‍ കുഞ്ഞു മുസ്‌ല്യാരുടെ വിദ്യാഭ്യാസ പ്രവര്‍ത്തനങ്ങളെ ആദരിച്ചു കൊണ്ട് 2001 ഒക്‌ടോബര്‍ 26-ന് ഇന്ത്യന്‍ സര്‍ക്കാര്‍ തപാല്‍ സ്റ്റാമ്പും ഫസ്റ്റ് ഡേ കവറും പുറത്തിറക്കി. ടികെഎം കോളേജ് ഓഫ് എഞ്ചിനീയറിംഗില്‍ ഒരു ഫിലാറ്റലി മ്യൂസിയം സ്ഥാപിച്ചു. സ്ഥാപകന്റെ സ്മരണയ്ക്കായി ആദരാഞ്ജലിയും സ്മാരകവുമായി 2019-ല്‍ കൊല്ലം കോര്‍പ്പറേഷന്‍ ആശ്രമത്തില്‍ എ.തങ്ങള്‍കുഞ്ഞ് മുസലിയാര്‍ പാര്‍ക്ക് സ്ഥാപിച്ചു. 1998 ല്‍ തങ്ങള്‍ കുഞ്ഞു മുസ്‌ലിയാരുടെ ജീവചരിത്രം പ്രൊഫ. പി. മീരാക്കുട്ടി മലയാളത്തില്‍ എഴുതിയിട്ടുണ്ട്.

ആധുനിക എന്‍ജിനീയറന്മാരെ അദ്ഭുതപ്പെടുത്തുന്ന തരത്തിലുള്ള പല യന്ത്രങ്ങളും തന്റെ ശാസ് ത്രീയമായ ചിന്താഗതിയും ധിഷണാശക്തിയും പ്രയോഗിച്ച് രൂപപ്പെടുത്തുകയും വ്യവസായ പ്രവര്‍ത്തനങ്ങളുടെ പുരോഗതിക്ക് ഉപയോഗിക്കുകയും ചെയ്തിട്ടുണ്ട്. കശുവണ്ടി ഫാക്ടറികളില്‍ ഉപയോഗിക്കുന്ന ഒട്ടനേകം യാന്ത്രോപകരണങ്ങളുടെ ഉപജ്ഞാതാവ് എന്ന നിലയിലും ഇദ്ദേഹം പ്രശംസയര്‍ഹിക്കുന്നു.

ഖദീജ കുഞ്ഞ്, നബീസ ബീവി, ആയിഷ ബീവി എന്നിങ്ങനെ മൂന്ന് ഭാര്യമാരും ഇരുപത്തിയൊന്ന് കുട്ടികളും ഉണ്ടായിരുന്നു. അദ്ദേഹത്തിന്റെ മക്കള്‍ പ്രമുഖ വ്യവസായികളും സാങ്കേതിക വിദഗ്ധരും അക്കാദമിക് വിദഗ്ധരുമാണ്.

1966 ഫെബ്രുവരി 19 ന് മുസ്‌ലിയാര്‍ മരണപ്പെട്ടു.

Reference:
https://www.tkmce.ac.in/founder-tkm.php