അറിവിന്റെ സംരക്ഷണവും വികസനവും മനുഷ്യ നാഗരികതയുടെ മുന്നേറ്റത്തിന് നിര്‍ണായകമായ ഘടകങ്ങളായിരുന്നു. ഈ രംഗത്ത് മുസ്‌ലിം ലോകം രൂപപ്പെടുത്തിയ വിദ്യാഭ്യാസ സ്ഥാപനങ്ങള്‍ അതിവിശേഷമായ പങ്ക് വഹിച്ചു. പ്രമുഖ യൂനിവേഴ്‌സിറ്റികള്‍ എന്ന വിഭാഗത്തിലേക്ക് ഉള്‍പ്പെടുന്ന കൊര്‍ഡോവ, ഗ്രാനഡ, മദീന, മലേഷ്യ തുടങ്ങിയ കേന്ദ്രങ്ങള്‍ മതപഠനങ്ങളോടൊപ്പം ശാസ്ത്രം, തത്ത്വചിന്ത, ഭാഷാശാസ്ത്രം തുടങ്ങിയ വിഷയങ്ങളിലും സംഘടിത പഠനം സാധ്യമാക്കിയവയായിരുന്നു. ഇവ ലോക വിദ്യാഭ്യാസ ചരിത്രത്തില്‍ മുസ്‌ലിം ബൗദ്ധിക സംഭാവനകളുടെ കേന്ദ്രങ്ങളായി മാറി.
യൂറോപ്യന്‍ രാജ്യങ്ങളില്‍ ആദ്യമായി ഇസ്‌ലാമിക സന്ദേശം എത്തിച്ചേര്‍ന്നത് സ്‌പെയിനിലാണ്. ജിബ്രാള്‍ട്ടര്‍ കടലിടുക്ക് കടന്ന് സ്‌പെയിനിലെത്തിയ മുസ്‌ലിംകള്‍ സ്‌പെയിനിന്റെ ഭരണം കൈയാളുന്ന അവസ്ഥ വരെയെത്തി. നൂറ്റാണ്ടുകള്‍ ഭരണം നടത്തിയ മുസ്‌ലിം ഭരണാധികാരികള്‍ വൈജ്ഞാനിക രംഗത്തും വലിയ സംഭാവനകള്‍ അര്‍പ്പിച്ചിട്ടുണ്ട്. ലോകനാഗരികതയ്ക്ക് മുസ്‌ലിംകള്‍ നല്‍കിയ സംഭാവനകളിലൊന്നാണ് സ്‌പെയിനിലെ കൊര്‍ഡോവ സര്‍വകലാശാല. ആധുനിക യൂണിവേഴ്‌സിറ്റികളുടെ നിലവാരം അതിനുണ്ടായിരുന്നു. മതശാസ്ത്രങ്ങള്‍ക്കു പുറമെ ജ്യോതിശ്ശാസ്ത്രം, ഗണിതം, വൈദ്യം എന്നിവയ്ക്കും കൊര്‍ഡോവയില്‍ പ്രത്യേകം ഡിപ്പാര്‍ട്ടുമെന്റുകളുണ്ടായിരുന്നു. സ്‌പെയിനിലെ മുസ്‌ലിം ഭരണം അവസാനിച്ചെങ്കിലും ഈ വിജ്ഞാന സാഗരം ലോകത്തിന് അറിവിന്റെ മുത്തുകളും രത്‌നങ്ങളും സംഭാവന ചെയ്തുകൊണ്ടിരുന്നു. സ്‌പെയിനിലെ കൊര്‍ഡോവ, സെവില്ല, മലാഗ, ഗ്രാനഡ എന്നീ പ്രധാന നഗരങ്ങളില്‍ ഉന്നത പഠന കേന്ദ്രങ്ങള്‍ സ്ഥാപിച്ചിരുന്നു.
സുല്‍ത്താന്‍ യൂസുഫ് അബുല്‍ ഹജ്ജാജ് (ക്രി.1333-1354) സ്ഥാപിച്ച ഗ്രാനഡ യൂണിവേഴ്‌സിറ്റി ഏറെ പ്രശസ്തമാണ്. ദൈവശാസ്ത്രം, നിയമം, വൈദ്യം, തത്ത്വശാസ്ത്രം, രസതന്ത്രം, ജ്യോതിര്‍ ഗണിതം മുതലായവ പ്രധാന പാഠ്യവിഷയങ്ങളായിരുന്നു. മതഭേദമെന്യേ പഠിതാക്കള്‍ ഇവിടെ എത്തിച്ചേര്‍ന്നു. മന്ത്രിയും സാഹിത്യകാരനുമായ ലിസാനുദ്ദീന്‍ അല്‍ ഖതീബായിരുന്നു ഈ യൂണിവേഴ്‌സിറ്റിയുടെ സ്ഥാപനനേതൃത്വം വഹിച്ചത്.
‘ധിഷണാശാലിയുടെ ജ്ഞാനം, ഭരണാധിപന്റെ നീതിബോധം, സജ്ജനങ്ങളുടെ പ്രാര്‍ഥന, വീരന്റെ ധീരത എന്നീ നാലു സ്തൂപങ്ങളിന്‍മേല്‍ ലോകം സ്ഥാപിക്കപ്പെട്ടിരിക്കുന്നു’ എന്ന വാക്യം യൂണിവേഴ്‌സിറ്റി കവാടത്തില്‍ എഴുതിവെച്ചതില്‍ നിന്ന് അന്നത്തെ ധൈഷണിക ഔന്നത്യം നമുക്ക് ഊഹിച്ചെടുക്കാം (ഹിസ്റ്ററി ഓഫ് അറബ്).
ലോകാടിസ്ഥാനത്തിലുള്ള ഇസ്‌ലാമിക വിദ്യാഭ്യാസ കേന്ദ്രമാണ് സുഊദി അറേബ്യയിലെ ഇസ്‌ലാമിക് യൂണിവേഴ്‌സിറ്റി മദീന. ഹിജ്‌റ വര്‍ഷം 1381 റബീഉല്‍ അവ്വല്‍ ഇരുപത്തി അഞ്ചിന് ഇത് നിലവില്‍ വന്നു. സുഊദികളല്ലാത്ത ആയിരക്കണക്കിന് വിദ്യാര്‍ഥികള്‍ യൂനിവേഴ്‌സിറ്റിയില്‍ നിന്ന് ഇതിനകം പഠനം പൂര്‍ത്തിയാക്കിയിട്ടുണ്ട്.
ഇസ്‌ലാമിന്റെ അനശ്വര സന്ദേശങ്ങള്‍ ലോകത്തിന്റെ മുക്കുമൂലകളില്‍ എത്തിക്കുക, ലോകത്തിന്റെ വിവിധ ഭാഗങ്ങളില്‍ നിന്നും വരുന്ന വിദ്യാര്‍ഥികള്‍ക്ക് ഇസ്‌ലാമിക വിജ്ഞാനീയങ്ങളില്‍ അവഗാഹം നേടാന്‍ അവസരമൊരുക്കുക, ഇസ്‌ലാമിന്റെ പാരമ്പര്യത്തിന്റെ പ്രധാന രേഖകള്‍ കണ്ടെത്തി പ്രസിദ്ധീകരിക്കുക, വിവിധ സര്‍വകലാശാലകളും സംഘടനകളുമായി ബന്ധം സ്ഥാപിക്കുക, ഇസ്‌ലാമിക വിഷയങ്ങളില്‍ ഗവേഷണാത്മക പഠനം നടത്തുക തുടങ്ങിയവയാണ് സര്‍വകലാശാലയുടെ ലക്ഷ്യങ്ങള്‍.
അറബിയിലും ഇംഗ്ലീഷിലും മറ്റു ഭാഷകളിലുമായി നാലുലക്ഷത്തോളം ഗന്ഥങ്ങളടങ്ങിയ ബൃഹദ് ലൈബ്രറിയും യൂണിവേഴ്‌സിറ്റിക്കുണ്ട്. കേരളത്തില്‍ നിന്നുള്ള നിരവധി പണ്ഡിതന്മാര് മദീനാ യൂണിവേഴ്‌സിറ്റിയില്‍ ഉപരിപഠനം പൂര്‍ത്തിയാക്കിയിട്ടുണ്ട്. സൗജന്യമായിട്ടാണ് ഇവിടെ വിദ്യാഭ്യാസം നല്‍കുന്നത്. പഠനമാധ്യമം അറബിയാണ്. സെപ്തംബര്‍ മുതല്‍ ജൂണ്‍വരെയാണ് അക്കാദമിക വര്‍ഷമായി കണക്കാക്കുന്നത്.
യൂനിവേഴ്‌സിറ്റി കൗണ്‍സില്‍, ഡീന്‍സ് കൗണ്‍സില്‍, ഫാക്കല്‍റ്റി കൗണ്‍സില്‍, ഡിപ്പാര്‍ട്ട്‌മെന്റ് കൗണ്‍സില്‍ എന്നീ ബോഡികളാണ് ഭരണനിര്‍വഹണം നടത്തുന്നത്.
ഔദ്യോഗിക വെബ്‌സൈറ്റ്: https://iu.edu.sa/en-us
1977-ല്‍ മക്കയില്‍ നടന്ന പ്രഥമ മുസ്‌ലിം വിദ്യാഭ്യാസ സമ്മേളനത്തില്‍ (World Conference on Muslim Education) ആധുനിക ലോകത്ത് മുസ്‌ലിം ഉമ്മത്ത് നേരിടുന്ന വെല്ലുവിളികളെ നേരിടാന്‍ പ്രാപ്തമായ ഒരു തലമുറയെ വളര്‍ത്തിയെടുക്കാനുതകുന്ന ഇസ്‌ലാമിക്ക് യൂണിവേഴ്‌സിറ്റികള്‍ സ്ഥാപിക്കണമെന്ന ആശയം ഉയര്‍ന്നു വന്നു. ഇരുപതാം നൂറ്റാണ്ട് സാക്ഷ്യം വഹിച്ച ഇസ്‌ലാമിക നവജാഗരണത്തിന്റെ തുടര്‍ച്ചകളിലൊന്നായിരുന്നു ഇസ്‌ലാമിക സര്‍വകലാശാലകള്‍. ഇതിനെത്തുടര്‍ന്നാണ് 1983ല്‍ ഇന്റര്‍നാഷനല്‍ ഇസ്‌ലാമിക് യൂണിവേഴ്‌സിറ്റി മലേഷ്യ (ഐ.ഐ.യു.എം) സ്ഥാപിതമാകുന്നത്. 1983-ല്‍ അന്നത്തെ മലേഷ്യന്‍ പ്രധാന മന്ത്രി മഹാതീര്‍ മുഹമ്മദിന്റെ നേതൃത്വത്തിലുള്ള മന്ത്രിസഭയാണ് ഐ ഐ യു എമ്മിന് ഔദ്യോഗിക അനുമതി നല്‍കുന്നത്. തുര്‍ക്കി, സൗദി അറേബ്യ, പാകിസ്താന്‍, ബംഗ്ലാദേശ്, മലേഷ്യ, സുഡാന്‍ തുടങ്ങിയ രാജ്യങ്ങളുടെ പിന്തുണയോടെ പാക്കിസ്താനിലും ബംഗ്ലാദേശിലും സുഡാനിലും സമാനമായ യൂണിവേഴ്‌സിറ്റികള്‍ സ്ഥാപിക്കപ്പെട്ടെങ്കിലും പ്രഖ്യാപിത ലക്ഷ്യവുമായി ഏറെ മുന്നോട്ടുപോയതും ഉന്നത നിലവാരത്തിലേക്കുയര്‍ന്നതും ഐ ഐ യുഎമ്മാണ്.
മികച്ച അടിസ്ഥാന സൗകര്യങ്ങളും പ്രഫഷനലിസവും സ്വഛസുന്ദരമായ പഠനന്തരീക്ഷവും ലോകത്തിന്റെ നാനാഭാഗങ്ങളിലുമുള്ള വിദ്യാര്‍ഥികളെ ഐ ഐ യു എമ്മിലേക്ക് ആകര്‍ഷിക്കുന്നു. എണ്‍പതുകളില്‍ മുസ്‌ലിം ചിന്താമണ്ഡലത്തില്‍ ഏറെ ചര്‍ച്ച ചെയ്യപ്പെട്ട ഇസ്‌ലാമേസേഷന്‍ ഓഫ് നോളജ് (വിജ്ഞാനത്തിന്റെ ഇസ്‌ലാമികവല്‍കരണം) എന്ന ആശയത്തിന്റെ ഉപജ്ഞാതാക്കളും പ്രയോക്തക്കളുമാണ് യൂണിവേഴ്‌സിറ്റിയുടെ അണിയറശില്‍പികളില്‍ അധികവും. ഇസ്മാഇല്‍ റാജി ഫാറൂഖി, സയ്യിദ് നഖീബ് അല്‍ അതാസ്, അബീ ഹാമിദ് അബൂ സുലൈമാന്‍, കമാല്‍ ഹസന്‍ തുടങ്ങിയ ഇസ്‌ലാമിക ചിന്തകരാല്‍ ലോകശ്രദ്ധ പിടിച്ചു പറ്റിയ ആശയം യൂണിവേഴ്‌സിറ്റിയുടെ മുദ്രാവാക്യവും പാഠ്യപദ്ധതിയിലെ മുഖ്യവിഷയവുമാണ്. അതു തന്നെയാണ് ഐ ഐ യുഎമ്മിനെ മറ്റു സര്‍വ്വകലാശാലകളില്‍ നിന്ന് വ്യത്യസ്തമാക്കുന്നതും. 90 രാജ്യങ്ങളില്‍ നിന്നായി പതിനയ്യായിരത്തിലധികം വിദ്യാര്‍ഥികള്‍ ഈ സ്ഥാപനത്തില്‍ പഠിച്ചു കൊണ്ടിരിക്കുന്നു. Integration, Islamization, Internationalization, and Comprehensive Excellence എന്ന ബഹുമുഖ ലക്ഷ്യനിര്‍വഹണത്തിലേക്കുള്ള പാതയിലാണ് ഐ എ യു എം.
ഇന്ത്യയിലെ ഉന്നത ഇസ്‌ലാമിക വിദ്യാഭ്യാസ കേന്ദ്രങ്ങളായ ദാറുല്‍ ഉലൂം ദയൂബന്ദ്, ബാഖിയാതു സ്വലിഹാത്, നദ്‌വത്തുല്‍ ഉലൂം എന്നിവ പോലെ കേവല ഇസ്‌ലാമിക വിഷയങ്ങളിലുള്ള കോഴ്‌സുകള്‍ മാത്രമല്ല, ഐ ഐ യു എം ഓഫര്‍ ചെയ്യുന്നത്. ഇസ്‌ലാമിക വിഷയങ്ങള്‍ക്കു പുറമേ മെഡിക്കല്‍ സയന്‍സ്. ഹ്യൂമന്‍ സയന്‍സ്, എന്‍ജിനീയറിംഗ്, ആര്‍കിടെക്ചര്‍, എജ്യുകേഷന്‍, ലോ, പൊളിറ്റികല്‍ സയന്‍സ്, ഹിസ്റ്ററി ആന്റ് സിവിലൈസേഷന്‍, എംബിഎ, മാനേജ്‌മെന്റ് കോഴ്‌സുകള്‍, ഇസ്‌ലാമിക് ഫിനാന്‍സ് ആന്റ് ബാങ്കിങ്ങ് തുടങ്ങി നിരവധി കോഴ്‌സുകളും ഐ ഐ യു എമ്മിനെ സാമ്പ്രദായിക ഇസ്‌ലാമിക കലാലയങ്ങളില്‍ നിന്ന് വ്യത്യസ്തമാക്കുന്നു.
കൊലാലംബുര്‍ നഗരത്തില്‍ നിന്ന് 25 കി.മീ. വടക്ക് കിഴക്കു മാറി പ്രകൃതിരമണീയമായ ഗോംബാകിലാണ് 700 ഏക്കര്‍ വിസ്തൃതിയുള്ള പ്രധാന കാമ്പസ.് ഐ ഐ യു എം റെക്ടറും ഇപ്പോഴും ഇന്റര്‍നാഷനല്‍ ഇന്‍സ്റ്റിറ്റ്യൂട്ട് ഓഫ് ഇസ്‌ലാമിക് തോട്ടിന്റെ ചെയര്‍മാനുമായ അബു ഹാമിദ് അബൂ സുലൈമാന്റെ രൂപകല്‍പ്പനയില്‍ ഇസ്‌ലാമിക വാസ്തുശില്‍പകലയും എന്‍ജിനീയറിംഗ് വൈദഗ്ധ്യവും സമ്മേളിക്കുന്നതാണ് ഗോംബാക് കാമ്പസ്.
വിശാലമായ കാമ്പസിനു മധ്യത്തിലായി സ്ഥിതി ചെയ്യുന്ന പള്ളി മുസ്‌ലിം സമൂഹത്തിന്റെ ആത്മീയ ബൗദ്ധിക വൈജ്ഞാനിക കേന്ദ്രമാണെന്ന ശക്തമായ സന്ദേശം നല്‍കുന്നതാണ്. പള്ളിയുടെ പ്രധാന പ്രാര്‍ഥനാ ഹാള്‍ 9000 വിശ്വാസികളെ ഉള്‍ക്കൊള്ളാന്‍ മാത്രം വിശാലമാണ്. കൂടുതല്‍ വിദ്യാര്‍ഥികളുള്ള കുല്ലിയ്യ ഓഫ് ഇസ്‌ലാമിക് റിവീല്‍ഡ് നോളജ് & ഹ്യൂമന്‍ സയന്‍സിന് കീഴിലെ ഖുര്‍ആന്‍ & സുന്ന, ഉസ്വൂലുദ്ദീന്‍ & കംപാരറ്റീവ് റിലീജ്യന്‍, ഫിഖ്ഹ് & ഉസ്വൂലുല്‍ ഫിഖ്ഹ് എന്നീ മൂന്ന് ഡിപാര്‍ട്ടുമെന്റുകളാണ് പ്രധാനമായും ഇസ്‌ലാമിക വിഷയങ്ങള്‍ ഓഫര്‍ ചെയ്യുന്നത്. അണ്ടര്‍ ഗ്രാജുവേറ്റ് ബിരുദം മുതല്‍ ഗവേഷണ പഠനത്തിനു വരെയുള്ള അവസരം എല്ലാ വകുപ്പുകളിലുമുണ്ട്. ഇതിനു പുറമെ, ബിരുദാനന്തര ബിരുദ വിദ്യാര്‍ഥികള്‍ക്കും അധ്യാപകര്‍ക്കും ഏതു വിഷയത്തിലുമുള്ള ഗവേഷണത്തിന് അവസരമൊരുക്കുന്ന റിസര്‍ച്ച് സെന്ററും യൂണിവേഴ്‌സിറ്റി ക്യാമ്പസില്‍ തന്നെ പ്രവര്‍ത്തിച്ചുവരുന്നു. ഏഴു കാമ്പസുകളിലായി ഒരു മില്യനിലധികം വരുന്ന ഗ്രന്ഥശേഖരമുള്ള ലൈബ്രറി ഇസ്‌ലാമിക ലോകത്തെ ക്ലാസിക്കല്‍ കൃതികള്‍ കൊണ്ടും പൗരാണിക എക്കര്‍ വിസ്തീര്‍ണമുള്ള മെഡിക്കല്‍ ക്യാമ്പസും കൊലാംലംബൂരില്‍ തന്നെ യുള്ള ഇന്റര്‍ നാഷണല്‍ ഇന്‍സ്റ്റിറ്റിറ്റിയൂട്ട് ഓഫ് ഇസ്‌ലാമിക്ക് സയന്‍സ് ആന്റ് സിവിലേഷന്‍, ഇന്‍സിറ്റിറ്റിയൂട്ട് ഓഫ് ഇസ്‌ലാമിക് ബാങ്കിങ്ങ് ആന്റ് ഫിനാന്‍സും യൂണിവേഴ്‌സിറ്റിക്കു കീഴിലെ സഹോദരസ്ഥാപനങ്ങളാണ്.
ഇസ്‌ലാം വൈവിധ്യങ്ങളുടെ ഐ.ഐ.യു.എം കാമ്പസ് ദൃശ്യങ്ങള്‍
ലോകത്തിന്റെ നാനാ ദിക്കിലുമുള്ള മുസ്‌ലിം വിദ്യാര്‍ഥികളെ ഉള്‍ക്കൊള്ളുന്ന കാമ്പസ് സാംസ്‌കാരിക-ഭാഷാ- ജീവിതശൈലികളാല്‍ വൈവിധ്യങ്ങളെ ഉള്‍ക്കൊള്ളുക എന്നത് യൂണിവേഴ്‌സിറ്റിയുടെ പ്രഖ്യാപിത നയങ്ങളിലൊന്നാണ്. ശാഫി മദ്ഹബുകാരായ മലായ് ഇന്തോനേഷ്യന്‍ വംശജരും, ഹനഫികളായ ബംഗ്ലാദേശ് പാകിസ്താനികളും, മൊറൊക്കോ അള്‍ജീരിയ ടുണീഷ്യന്‍ പോലുള്ള ഉത്തരാഫ്രിക്കന്‍ നാടുകളില്‍ നിന്നുള്ള മാലികീ മദ്ഹബുകാരും ഹന്‍ബലികളും യൂണിവേഴ്‌സിറ്റിയില്‍ യഥേഷ്ടമുണ്ട്. ഒമാനിലും ചില ഉത്തരാഫ്രിക്കന്‍ രാജ്യങ്ങളിലും മാത്രമുള്ള ഇബാദികളും കാമ്പസിന്റെ വൈവിധ്യത്തിന് നിറം കൂട്ടുന്നു.
സ്ത്രീകള്‍ക്ക് അവസരമൊരുക്കുന്നതിലും യൂണിവേഴ്‌സിറ്റി മുന്നിട്ടു നില്‍ക്കുന്നു. വര്‍ധിച്ച സ്ത്രീപങ്കാളിത്തം, പഠന ഗവേഷണ ഉദ്യോഗതലങ്ങളിലൊക്കെയും ദൃശ്യമാണ്. ഐ ഐ യു എമ്മിന്റെ റെക്ടര്‍ പദവിയും ഉയര്‍ന്ന പല പദവികള്‍ വഹിക്കുന്ന മറ്റു പല ഉദ്യോഗസ്ഥരും സ്ത്രീകള്‍ തന്നെ. ഐ ഐയു എം പള്ളിയിലും മലേഷ്യയിലെ എതു ചെറിയ പള്ളിയിലും സ്ത്രീകളും നമസ്‌ക്കരിക്കുന്നത് പതിവു കാഴ്ച മാത്രമാണ്.
യൂണിവേഴ്‌സിറ്റിയുടെ മിഷനുകളില്‍ ഒന്നായ ഇന്റഗ്രേഷന്‍, മത-ഭൗതിക വിഷയങ്ങളിലെ സമന്വയം മാത്രമല്ല, മുസ്‌ലിം ഉമ്മത്തിന്റെ ഇന്റഗ്രേഷനും കൂടി ഉള്‍ക്കൊള്ളുന്നതാണെന്നു ബോധ്യപ്പെടുത്തുന്നതാണ് കാമ്പസിലെ അന്തരീക്ഷം. എല്ലാ മദ്ഹബിലെയും സുപ്രധാന ഗ്രന്ഥങ്ങള്‍ പാഠ്യ പദ്ധതിയുടെ ഭാഗമായതു പോലെ, ഇസ്‌ലാമിക ലോകത്തെ പൗരാണികരും സമകാലികരുമായ പ്രഗല്‍ഭ പണ്ഡിതന്‍മാരെയും ചിന്താപ്രസ്ഥാനങ്ങളെയും സ്വതന്ത്രമായി പഠിക്കാനും മനസ്സിലാ ക്കാനും വിദ്യാര്‍ഥികള്‍ക്ക് അവസരമുണ്ട്. ഇഖ്ബാല്‍, റശീദ് രിദാ, ശഹീദ് സയ്യിദ് ഖുതുബ്, മൗലാനാ മൗദൂദി, ഇബ്‌നു ആശൂര്‍, അബുല്‍ ഹസന്‍ നദ്വി തുടങ്ങി യൂസുഫുല്‍ ഖറദാവി വരെ ധാരാളം പണ്ഡിതന്‍മാരുടെ ചിന്തകളും ആശയങ്ങളും ഇവിടെ ക്ലാസ്സിനകത്തും പുറത്തും ചര്‍ച്ച ചെയ്യപ്പെടുന്നു.
International Islamic University Malaysia
Jln Gombak, 53100 Kuala Lumpur, Selangor, Malaysia
Phone: (+603) 6421 6421
Fax: (+603) 6421 4053
Email Address:webmaster@iium.edu.my
