കേരള നദ്‌വത്തുല്‍ മുജാഹിദീന്‍ കേരളത്തിലെ മുസ്‌ലിം സമൂഹത്തിനിടയില്‍ പ്രവര്‍ത്തിക്കുന്ന പ്രമുഖ ഇസ്‌ലാമിക നവോത്ഥാന പ്രസ്ഥാനമാണ്. ഖുര്‍ആനും സുന്നത്തും പ്രമാണമായി സ്വീകരിച്ച് മതാചാരങ്ങളില്‍ ബോധവത്കരണവും ശുദ്ധീകരണവും ലക്ഷ്യമിടുന്ന സമീപനമാണ് സംഘടന പിന്തുടരുന്നത്. വിദ്യാഭ്യാസ പ്രവര്‍ത്തനങ്ങള്‍, ദഅ്‌വാ പ്രവര്‍ത്തനം, സാമൂഹ്യ പരിഷ്‌കരണം, പ്രസാധന മേഖലകള്‍ എന്നിവയിലൂടെ കേരള നദ്‌വത്തുല്‍ മുജാഹിദീന്‍ സമൂഹത്തില്‍ സജീവ സാന്നിധ്യം പുലര്‍ത്തുന്നു. അന്ധവിശ്വാസങ്ങള്‍ക്കെതിരെ ബോധവത്കരണം നടത്തുകയും ആധുനിക സാഹചര്യങ്ങളില്‍ ഇസ്‌ലാമിക പഠനങ്ങളെ പ്രസക്തമാക്കുകയും ചെയ്യുന്നതില്‍ ഈ പ്രസ്ഥാനത്തിന് പ്രധാന പങ്കുണ്ട്. കേരളത്തിലെ മത–സാമൂഹിക രംഗങ്ങളില്‍ ഈ സംഘടന നിര്‍ണായകമായ സ്വാധീനം ചെലുത്തിവരുന്നു.
1924ല്‍ രൂപീകൃതമായ കേരളജംഇയ്യത്തുല്‍ ഉലമ (കെ.ജെ.യു) 1947 ഏപ്രില്‍ 12ന് അതിന്റെ പ്രവര്‍ത്തക സമിതിയോഗം ചേര്‍ന്നു. പ്രസിഡണ്ട് കെ എം മൗലവിയുടെ അധ്യക്ഷതയില്‍ നടന്ന ആ പണ്ഡിത ചര്‍ച്ച പ്രധാനമായും ഒരു പുതിയ സംഘടന രൂപീകരിക്കുന്നതിനെ കുറിച്ചായിരുന്നു. പണ്ഡിതന്‍മാരും സാധാരണക്കാരും ഉള്‍പ്പെടുന്ന, ഖുര്‍ആനും സുന്നത്തും പ്രബോധനം ചെയ്യാന്‍ മുന്നോട്ടു വരുന്ന ഒരു ബഹുജന സംഘടനയെക്കുറിച്ച്. ചര്‍ച്ചയ്‌ക്കൊടുവില്‍ തീരുമാനം മിനുട്‌സ് രേഖയില്‍ ഇങ്ങനെ കുറിക്കപ്പെട്ടു.
‘ഖുര്‍ആനും ഹദീസുമനുസരിച്ച് ജീവിക്കുക എന്ന കേരള ജംഇയ്യത്തുല്‍ ഉലമയുടെ ആദര്‍ശം സ്വീകരിക്കുകയും അത് പ്രചരിപ്പിക്കുവാന്‍ പരിശ്രമിക്കുകയും ചെയ്യുന്ന ഉലമാക്കളും അല്ലാത്തവരുമായ എല്ലാവര്‍ക്കും സംഘടിക്കാവുന്ന ഒരു അഖില കേരള സംഘടന ഉണ്ടായിരിക്കേണ്ടതാണെന്ന് ഈ യോഗം അഭിപ്രായപ്പെടുകയും അതിന് വ്യക്തമായ മാര്‍ഗങ്ങളില്‍ കൂടി പരിശ്രമിച്ച് കഴിയുന്ന വേഗത്തില്‍ അങ്ങനെയുള്ള ഒരു സംഘടന രൂപീകരിക്കാന്‍ ഒരു കമ്മിറ്റിയെ അധികാരപ്പെടുത്തുകയും ചെയ്യുന്നു”.
മൂന്നു വര്‍ഷം കഴിഞ്ഞ് കോഴിക്കോട് അല്‍മനാര്‍ ഓഫീസില്‍ 1950 ഏപ്രില്‍ 20ന് 24 പേര് യോഗം ചേര്‍ന്നു. അവര്‍ കെ.ജെ.യു തീരുമാനമനുസരിച്ച് പുതിയ സംഘടനയ്ക്ക് രൂപം നല്കി. വന്നവരെല്ലാം അംഗത്വം സ്വീകരിച്ചു. കെ എം മൗലവി പ്രസിഡണ്ടും, എന്‍ വി അബ്ദുസ്സലാം മൗലവി (അരീക്കോട്) ജനറല്‍ സെക്രട്ടറിയുമായി 13 അംഗ കമ്മിറ്റി നിലവില്‍ വന്നു. കേരള നദ്‌വത്തുല്‍ മുജാഹിദീന്‍ അവിടെ പിറവി കൊള്ളുകയായിരുന്നു.
നൂറ്റാണ്ടിനപ്പുറം വെളിയങ്കോട് ഉമര്‍ ഖാദിയും മമ്പുറം തങ്ങളും കൊളുത്തി വെച്ച നവോത്ഥാന ശിഖ, ഹമദാനി തങ്ങളും മക്തി തങ്ങളും ഊതിക്കത്തിച്ച തിരിനാളം വക്കം മൗലവി കൈമാറിയ കൈത്തിരി ഐക്യസംഘത്തിലൂടെ കേരള ജംഇയ്യത്തുല്‍ ഉലമ ഏറ്റെടുത്തു. അതാണ് ആയിരം ജ്വാലകളായി കേരള നദ്‌വത്തുല്‍ മുജാഹിദീനിലൂടെ എരിയാന്‍ ആരംഭിച്ചത്.
പണ്ഡിതന്മാരുടെ പരിശ്രമത്തില്‍ സംശുദ്ധ വിശ്വാസത്തിന്റെ പ്രഭയുള്‍ക്കൊണ്ട ആയിരങ്ങള്‍ അണിനിരന്ന് പ്രബോധന പാതയില്‍ വീരഗാഥകള്‍ രചിക്കാനും അന്ധവിശ്വാസങ്ങളും ജീര്‍ണതകളുമില്ലാത്ത ഒരു സമൂഹത്തെ കേരളീയ പശ്ചാത്തലത്തില്‍ യാഥാര്‍ഥ്യമാക്കാനും കെ എന്‍ എം പ്രതിജ്ഞയെടുത്തു. കേരളത്തിലെ മുസ്‌ലിം സമൂഹത്തിന്റെ മത-വിദ്യാഭ്യാസ-സാമൂഹിക-രാഷ്ട്രീയ രംഗങ്ങളില്‍ നവജാഗരണം സൃഷ്ടിക്കാനും സമുദായത്തെ പുരോഗതിയുടെ പാതയിലേക്കെത്തിക്കാനും ആ മുന്നേറ്റത്തിന് സാധിച്ചു.
മുജാഹിദ് പ്രസ്ഥാനത്തിന്റെ ഈ ജൈത്രയാത്രക്ക് വിഘാതം സൃഷ്ടിച്ചു കൊണ്ട് 2002ല്‍ സംഘടന ഒരു പിളര്‍പ്പിന് വിധേയമായി. ഇതിന്റെ ഭാഗമായി കെ.എന്‍.എം മര്‍കസുദ്ദഅ്‌വ എന്ന സംഘടന നിലവില്‍ വന്നു.
സംഘടനക്ക് അകത്തും പുറത്തും നിന്നുള്ള പല ഐക്യശ്രമങ്ങളും നടന്നെങ്കിലും സമുദായത്തിനും പ്രസ്ഥാനത്തിനും ഏറെ നഷ്ടങ്ങളുണ്ടാക്കിയ ഈ അകല്‍ച്ച പരിഹാരിക്കാന്‍ പിന്നീട് പ്രസ്ഥാനത്തിന് കഴിഞ്ഞില്ല.
കെ.എന്‍.എമ്മില്‍ പിന്നെയും പ്രശ്‌നങ്ങള്‍ ഉണ്ടാവുകയും പല പണ്ഡിതരും നേതാക്കളും പലവഴിക്ക് നീങ്ങുകയും ചെയ്തു. ഇതില്‍ ഒരു വിഭാഗം ‘വിസ്ഡം ഗ്ലോബല്‍ ഇസ്‌ലാമിക് മിഷന്‍’ എന്ന പേരില്‍, സംഘടന രൂപീകരിച്ച് പ്രവര്‍ത്തിക്കാനും തുടങ്ങി.
2016ല്‍ കെ.എന്‍.എമ്മും മര്‍കസുദ്ദഅ്‌വയും പോഷകഘടങ്ങളും തമ്മില്‍ ഐക്യം രൂപപ്പെട്ടെങ്കിലും അത് വേണ്ടവിധത്തില്‍ വിജയിച്ചില്ല. അതിനാല്‍ കെ.എന്‍.എം എന്ന രജിസ്‌ട്രേഡ് സംഘടനക്കു പുറമെ കെ.എന്‍.എം മര്‍കസുദ്ദഅ്‌വ എന്ന പേരില്‍ മറ്റൊരു സംഘടനയും എല്ലാ പോഷകഘടകങ്ങളോടുമൊപ്പം ഇസ്വ്‌ലാഹീ നവോത്ഥാന വീഥിയില്‍ വ്യവസ്ഥാപിതമായി പ്രവര്‍ത്തിച്ചു വരുന്നു.
കെ ജെ യുവിന്റെ പരിശ്രമങ്ങളാല്‍ നാടിന്റെ നാനാഭാഗങ്ങളില്‍ ഒറ്റയ്‌ക്കൊറ്റയ്ക്ക് പ്രവര്‍ത്തിച്ചിരുന്ന സംഘങ്ങളുടെ കൂട്ടായ്മയാണ് കേരള നദ്‌വത്തുല്‍ മുജാഹിദിന്‍ ആയി രൂപം കൊണ്ടത്. അരീക്കോട്ട് എന്‍ വി അബ്ദുസ്സലാം മൗലവിയുടെ നേതൃത്വത്തില്‍ പ്രവര്‍ത്തിച്ചിരുന്ന ജംഇയ്യത്തുല്‍ മുജാഹിദീനില്‍ നിന്നാണ് ഈ പേര് ഉത്ഭവം കൊണ്ടത്.
മുജാഹിദുകള്‍ പ്രവര്‍ത്തനം സജീവമാക്കിയപ്പോള്‍ പിതാക്കളുടെ പാരമ്പര്യത്തിന് പ്രാധാന്യം കല്‍പിച്ചു കൊണ്ടു മാത്രം ദീനിനെ സ്വീകരിച്ചുപോന്നവര്‍ വെല്ലുവിളികള്‍ മുഴക്കി. ഖണ്ഡന മണ്ഡന പ്രസംഗങ്ങള്‍ പലപ്പോഴും അരങ്ങേറി. സംവാദങ്ങള്‍ നടന്നു. പൊതു വേദികളില്‍ വാദപ്രതിവാദങ്ങള്‍ പോലും നടത്തേണ്ടി വന്നു അങ്ങനെയാണ് വാദപ്രതിവാദ വേദികള്‍ ഉയരാന്‍ തുടങ്ങിയത്. 1951ല്‍ പൂനൂരിലാണ് ആദ്യ സുന്നി-മുജാഹിദ് വാദപ്രതിവാദം കേരളത്തില്‍ നടക്കുന്നത്. എടവണ്ണ അലവി മൗലവിയും പതി അബ്ദുല്‍ഖാദിര്‍ മുസ്‌ലിയാരും ആയിരുന്നു ഇരു ഭാഗത്തുമായി അതിനെ നയിച്ചത്.
1974ല്‍ കുറ്റിച്ചിറയിലും, 1983ല്‍ പുളിക്കല്‍ കൊട്ടപ്പുറത്തും ദിവസങ്ങള്‍ നീണ്ടുനിന്ന സംവാദം ചരിത്രത്തിന്റെ ഭാഗമായി. ഇതുകൂടാതെ ചെറുതും വലുതുമായ പത്തിലധികം സംവാദങ്ങള്‍ വേറെയും നടന്നു. തൗഹീദും ശിര്‍ക്കും തവസ്സുലും ഇസ്തിഗാഥയും സ്ത്രീകളുടെ പള്ളി പ്രവേശവും മറ്റു പല വിഷയങ്ങളും സംബന്ധിച്ചുള്ള തെളിവുകളുടെ ബലാബലം ഒരേ സമയം ഇരു വേദികളില്‍ നിന്നുമായി കേട്ടപ്പോള്‍ സത്യം പലര്‍ക്കും ബോധ്യപ്പെട്ടു. മുജാഹിദ് പ്രസ്ഥാന വളര്‍ച്ചയിലെ നാഴികകല്ലുകളായിരുന്നു വാദപ്രതിവാദങ്ങള്‍.
കെ സി അബൂബക്കര്‍ മൗലവി, എ പി അബ്ദുല്‍ ഖാദിര്‍ മൗലവി, സി പി ഉമര്‍ സുല്ലമി, ചെറിയമുണ്ടം അബ്ദുല്‍ ഹമീദ് മദനി, അലി അബ്ദുല്‍റസാഖ് മദനി തുടങ്ങിയവരുടെ സംഭാവനകള്‍ ഇതില്‍ ഗണനീയമായിരുന്നു.
പ്രസ്ഥാന വളര്‍ച്ചയിലെ മറ്റൊരു ഘടകമായിരുന്നു സമ്മേളനങ്ങള്‍. പ്രബോധന മാര്‍ഗത്തിലെ സമ്മേളനങ്ങള്‍ ഐക്യസംഘവും പിന്നീട് കേരള ജംഇയ്യത്തുല്‍ ഉലമയും തുടര്‍ന്ന് കെ എന്‍ എമ്മുമാണ് കേരളത്തിന് പരിചയപ്പെടുത്തിക്കൊടുത്തത്. 1968 വരെ കെ എന്‍ എമ്മും വാര്‍ഷിക സമ്മേളനങ്ങള്‍ നടത്തി.
1972ല്‍ കോഴിക്കോട്ടാണ് ആദ്യമായി ഒരു സംസ്ഥാനതല സമ്മേളനം നടന്നത്. പിന്നീട് വിപുലമായ രീതിയിലുള്ളതും വന്‍ജന പങ്കാളിത്തത്തോടെയുള്ളതുമായ സമ്മേളനം 1979ല്‍ മലപ്പുറം ജില്ലയിലെ പുളിക്കല്‍ വച്ചു നടന്നു. മൂന്നു വര്‍ഷത്തിനുശേഷം 1982ല്‍ ഫറോക്കിലും സമ്മേളനം നടന്നു. സമ്മേളനങ്ങള്‍ക്കിടയിലുള്ള കാലാവധി അഞ്ചു വര്‍ഷമാക്കിയതിനെത്തുടര്‍ന്ന് 1987ല്‍ കുറ്റിപ്പുറവും 1992ല്‍ പാലക്കാടും 1997 ല്‍ കണ്ണൂരിലെ പിലാത്തറയിലും നടന്നു. 2002 മുതല്‍ രണ്ട് വീതം സമ്മേളനങ്ങളായാണ് നടന്നത്. 2002ല്‍ കോഴിക്കോട്ടും എറണാകുളത്തും, 2007ല്‍ ചങ്ങരംകുളത്തും വയനാട്ടില്‍ പനമരത്തും, 2013ല്‍ കോഴിക്കോട്ടും 2014ല്‍ കോട്ടക്കലിനടുത്തെ എടരിക്കോടും ‘മുജാഹിദ് സമ്മേളനം’ എന്ന ബാനറില്‍ ചതുര്‍ദിന സമ്മേളനങ്ങള്‍ നടന്നു. 2017 ഡിസംബറില്‍ മലപ്പുറം ജില്ലയിലെ കൂരിയാട്ട നടന്ന ഒന്‍പതാം മുജാഹിദ് സമ്മേളനമാണ് ഏറ്റവും ഒടുവിലത്തേത്.
കേരള ജംഇയ്യത്തുല്‍ ഉലമയെ പണ്ഡിത സംഘടനയായംഗീകരിച്ചുകൊണ്ടാണ് കെ എന്‍ എം പ്രവര്‍ത്തിക്കുന്നത്. പണ്ഡിതര്‍ മുതല്‍ വിദ്യാര്‍ഥികള്‍, സ്ത്രീകള്‍, യുവാക്കള്‍ തുടങ്ങി ആര്‍ക്കും ഇതില്‍ അംഗങ്ങളാകാം. ഖുര്‍ആനും സുന്നത്തും അനുസരിച്ച് വിശുദ്ധ ജീവിതം നയിക്കുമെന്നും സംഘടനാ അച്ചടക്കം പാലിക്കുമെന്നുമുള്ള പ്രതിജ്ഞയോടെ അംഗത്വമെടുക്കാം. സംസ്ഥാന സമിതിക്കു പുറമെ, ജില്ലാ, മണ്ഡലം, പഞ്ചായത്ത്, ശാഖ കമ്മിറ്റികളും നിലവിലുണ്ട്. സംസ്ഥാന കൗണ്‍സിലിനാണ് കാര്യ നിര്‍വഹണ സമിതിയെയും ഭാരവാഹികളെയും തീരുമാനിക്കാനുള്ള അധികാരം.
നദ്‌വത്തിന് കീഴില്‍ സമൂഹത്തിന്നാവശ്യമായ എല്ലാ പ്രവര്‍ത്തന മേഖലകളിലും പ്രത്യേകം വിംഗുകളുണ്ട്. യുവാക്കള്‍ക്കായി ഇത്തിഹാദു ശ്ശുബ്ബാനില്‍ മുജാഹിദീന്‍ (ഐ എസ് എം) 1967ലും, വിദ്യാര്‍ഥികള്‍ക്കായി മുജാഹിദ് സ്റ്റൂഡന്‍സ് മൂവ്‌മെന്റ് (എം എസ് എം) 1971 ലും, വനിതകള്‍ക്കായി മുസ്‌ലിം ഗേള്‍സ് ആന്‍ഡ് വിമന്‍സ് മൂവ്‌മെന്റ് (എം. ജി എം) 1987 ലും നിലവില്‍ വന്നു. പില്ക്കാലത്ത് എം ജി എം സ്റ്റൂഡന്റ്‌സ് വിംഗും രൂപീകരിച്ചിരുന്നു. യുവ-കൗമാര-വനിതാ വിഭാഗങ്ങളില്‍ ഇസ്‌ലാമിക ചിന്തയുണര്‍ത്തുന്നതില്‍ അനല്‍പമായ പങ്കാണ് ഈ ഘടകങ്ങള്‍ വഹിച്ചത്.
പ്രസിദ്ധീകരണ രംഗത്തും കെ എന്‍ എം വിപ്ലവമുണ്ടാക്കി. അല്‍മുര്‍ശിദിന്റെ പിന്‍മുറക്കാര്‍ പിന്നീട് അല്‍മനാര്‍ (കെ എന്‍ എം മുഖപത്രം), ശബാബ് (ഐ എസ് എം മുഖപത്രം) പുടവ (എം ജി എം), ഇഖ്‌റഅ് (എം എസ് എം) എന്നിങ്ങനെ പ്രസിദ്ധീകരണങ്ങള്‍ പുറത്തിറക്കി. ഇഖ്‌റഅ്, പിന്നീട് വന്ന സര്‍ഗവിചാരം, ബാലകൗതുകം എന്നിവ ഇപ്പോള്‍ പ്രസിദ്ധീകരിക്കുന്നില്ല. ‘വിശുദ്ധ ഖുര്‍ആന്‍ വിവരണ’മെന്ന പേരില്‍ മലയാളത്തില്‍ സമാനതകളില്ലാത്തതും കെ.എം.മൗലവി, അലവി മൗലവി, പി കെ മൂസ മൗലവി, മുഹമ്മദ് അമാനി മൗലവി എന്നിവര്‍ തുടക്കം കുറിക്കുകയും അമാനി മൗലവിയുടെ തൂലികയിലൂടെ പൂര്‍ത്തീകരിക്കുകയും ചെയ്ത രചന വിശുദ്ധ ഖുര്‍ആന്‍ പ്രചാരണ രംഗത്ത് വലിയ മുതല്‍ക്കൂട്ടാണ്. കെ.എന്‍.എം. പബ്ലിഷിംഗ് വിംഗ് ആണ് ഇത് പ്രസിദ്ധീകരിച്ചത്. ഐ.എസ്.എം ന്റെ കീഴില്‍ 1987 ല്‍ ആരംഭിച്ച യുവത ബുക്ക് ഹൗസ് ഇതിനകം മുന്നൂറിലധികം കനപ്പെട്ട ഗ്രന്ഥങ്ങള്‍ പുറത്തിറക്കിയിട്ടുണ്ട്.
കേരളക്കരയില്‍ വ്യവസ്ഥാപിതമായ മദ്‌റസാ പഠനത്തിന് തുടക്കം കുറിച്ച മുജാഹിദ് പ്രസ്ഥാനത്തിനു കീഴില്‍ വിദ്യാഭ്യാസ ബോര്‍ഡും പ്രവര്‍ത്തിക്കുന്നുണ്ട്. ഉന്നത മതപഠന കേന്ദ്രങ്ങളായ എടവണ്ണ ജാമിഅ നദ്‌വിയ്യ, പുളിക്കല്‍ ജാമിഅ സലഫിയ്യ, പുളിക്കല്‍ മദീനത്തുല്‍ ഉലൂം, മോങ്ങം അന്‍വാറുല്‍ ഇസ്‌ലാം എന്നിവ സംഘടന നേരിട്ടു നടത്തുന്ന സ്ഥാപനങ്ങളാണ്. അരീക്കോട് സുല്ലമുസ്സലാം, വളവന്നൂര്‍ അന്‍സാര്‍, ഫറൂഖ് റൗദത്തുല്‍ ഉലും, കടവത്തൂര്‍ നുസ്‌റത്തുല്‍ ഇസ്‌ലാം, പാറാല്‍ ദാറുല്‍ ഇര്‍ശാദ്, തിരൂരങ്ങാടി കെ എം എ ഒ, എടക്കര ഗൈഡന്‍സ്, കുനിയില്‍ അന്‍വാറുല്‍ ഇസ്‌ലാം, വാഴക്കാട് ദാറുല്‍ഉലൂം, മേപ്പയൂര്‍ സലഫിയ്യ തുടങ്ങിയവയും പറളി, എടത്തനാട്ടുകര, ചുങ്കത്തറ തുടങ്ങിയ മൂപ്പതിലധികം കോളേജുകള്‍ ഈ പ്രസ്ഥാനത്തിന്റെ വെളിച്ചം ഊര്‍ജ്ജമാക്കി പ്രവര്‍ത്തിക്കുന്നു. നൂറുക്കണക്കിന് പള്ളികള്‍, പ്രബോധന സ്ഥാപനങ്ങള്‍, ഹിലാല്‍ കമ്മിറ്റി, ഗള്‍ഫ് രാജ്യങ്ങളില്‍ ഇസ്‌ലാഹി സെന്ററുകള്‍ എന്നിവയും നദ്‌വത്തുമായി കൈകോര്‍ത്തു നീങ്ങുന്നു.
